King Oscar kino vart starta opp saman med Halsnøy samfunnshus i oktober 1984.
Jan Petter Myhre er kinosjef, og har ansvaret for den tekniske drifta og filmutvalet, programmering av film som det heiter på fint. Det flotte namnet, King Oscar, fekk me overta etter avtale med Christian Bjelland hermetikkfabrikk. Samfunnshuset hadde tidlegare vore fabrikk nummer 13 i dette konsernet, og merkenamnet King Oscar er kjend verda over.
I tillegg til å vera eit kjend merkenamn, spelar også namnet mot den kjende utdelinga av Oscar-statuetten, som er den gjevaste prisutdelinga for film i heile verda.

Kinoen vert driven etter dugnadsprinsippet, og tilfører Halsnøy samfunnshus viktige inntekter. King Oscar kino har normalt framsyning to gonger i veka:
Fredag og sundag. I tillegg er det av og til familieframsyningar på laurdagar.
Besøkstala for kinoen har variert. På det beste var 12.000 Halsnøybuar på kino kvart år.
No er me nede i 4000 besøkande i eit normalår.
Nedgangen har stort sett følgt den generelle nedgangen i kinobesøk over heile landet.